यवतमाळ : शेतकऱ्यांना सिंचनासाठी दिवसा अखंडित व शाश्वत वीज पुरवठा करण्यासाठी मुख्यमंत्री सौर कृषी वाहिनी योजना २.० सुरु करण्यात आली. जिल्ह्यातील ३ मेगावॅट क्षमतेचा पहिला सौर प्रकल्प कळंब तालुक्यातील सावरगाव (परसोडी) येथे सुरु केला आहे. मुख्य अभियंता ज्ञानेश कुलकर्णी यांच्या हस्ते उद्घाटन करण्यात आले. या प्रकल्पामुळे परिसरातील १०४६ शेतकऱ्यांना दिवसा वीज पुरवठा मिळणार आहे.
मुख्यमंत्री सौर कृषी वाहिनी योजना २.० अंतर्गत राज्यात १६,००० मेगावॅट क्षमतेचे सौर ऊर्जा प्रकल्प उभारण्यात येत असून महावितरणचे व्यवस्थापकीय संचालक श्री. लोकेश चंद्र यांच्या मार्गदर्शनाखाली मुख्यमंत्री सौर कृषी वाहिनी योजना २.० ला गती देण्यात आली आहे.अमरावती परिमंडळात सुरू करण्यात आलेला हा पहिला सौर प्रकल्प आहे. सावरगाव सौरप्रकल्प महावितरणच्या उपकेंद्रापासून सुमारे दोन किलोमीटर अंतरावर असलेल्या १५ एकर शासकीय जमिनीवर उभारण्यात आला आहे. अवादा या विकासकामार्फत पूर्ण करण्यात आलेला हा प्रकल्प महावितरणच्या ३३ केव्ही सावरगाव (परसोडी) उपकेंद्राशी जोडण्यात आला आहे. त्यामुळे ३३ केव्ही सावरगाव (परसोडी) उपकेंद्रातून निघणाऱ्या ०३ कृषी वीज वाहिनीवरील २५ गावातील १०४६ शेतकऱ्यांना दिवसा वीजपुरवठा मिळणार आहे.
प्रकल्पाचे काम जलद गतीने पूर्ण करण्यासाठी अधीक्षक अभियंता प्रविण दरोली, कार्यकारी अभियंता पुरूषोत्तम चव्हाण, शशांक पोंक्षे ,उपकार्यकारी अभियंता मांगीलाल राठोड, सागर डेकाटे, सुहास मेश्राम तसेच सावरगाव येथील सरपंच शशीकांत देशमुख यांनी जमीन हस्तांतर ते प्रकल्पपूर्ती करिता महत्वाची भूमिका पार पाडली. सौर ऊर्जेचा वापर करून स्थानिक पातळीवर वीज निर्माण करायची व त्याच्या आधारे कृषी पंपांना दिवसा वीज पुरवठा करायचा अशी ही योजना आहे. त्यासाठी राज्यात विविध ठिकाणी विकेंद्रित स्वरुपात सौरऊर्जा निर्मिती केंद्रे उभारण्यात येत आहेत.अवादा एनर्जी प्रा.लि. या विकासकामार्फत जिल्ह्यात २२५ मेगावॅट वीज निर्मितीसाठी ३९ उपकेंद्राकरीता ५७ ठिकाणी क्लस्टर पध्दतीन सौर प्रकल्प उभारण्यात येत आहेत. यातील सावरगाव (परसोडी) हा पहिला प्रकल्प सुरू करण्यात आला आहे. यामुळे शेतकऱ्यांची दिवसा व शाश्वत वीज पुरवठ्याची मागणी पूर्ण होणार आहे.
0 Comments