उसाची बैलगाडी अंगावरून गेली : बालकाचा मृत्यू

 बैलगाडी चालकास अटक : महागाव तालुक्यातील घटना

यवतमाळ : उस भरुन घेवून जाणारी बैलगाडी अंगावरून गेल्याने एका १२ वर्षीय बालकाचा मृत्यू झाला. ही घटना आज बुधवार दिनांक १२ मार्च रोजी सकाळी महागाव तालुक्यातील सवना येथे घडली.

रामेश्वर अशोक पवार वय १२ रा. सवना असे मृतकाचे नाव आहे. आज १२ मार्च रोजी सकाळी नॅचरल शुगर कारखान्याचे ऊस तोडणी कामगार आपापल्या बैलगाड्या ऊस तोडणी साठी वाकोडी शिवारात घेवून गेल्या होत्या. ऊस तोडून बैलगाड्या कारखान्यात आणत होत्या. सवना या गावाला लागून असलेल्या नाल्याजवळ अशोक पवार या ऊस तोडणी कामगाराचा मुलगा रामेश्वर हा सायकलने समोर जात होता. अशातच रामेश्‍वरच्या सायकलची चैन पडली. त्यामुळे तो चैन बसवीत होता. दरम्यान पाठीमागून भरलेली बैलगाडी त्याच्या अंगावरुन गेली असून, छातीला गंभीर मार लागला. यावेळी रामेश्वर पवार याला सवना येथील ग्रामिण रुग्णालयात दाखल केले. मात्र डॉक्टर एस. एन. लाभाटे यांनी रामेश्‍वरचा मृत्यू झाल्याचे घोषित केले. मृतकचे वडील अशोक पवार यांनी महागाव पोलीस ठाणे गाठून तक्रार दिली. बैलगाडी चालक सय्यद अली सय्यद नाशीर यांनी निष्काळजीपणे बैलगाडी चालून रामेश्वर पवार यांच्या अंगावरून नेल्याने त्याला मृत्यू झाला असे नमुद केले आहे. महागाव पोलिसांनी बैलबंडी चालकाला अटक केली. पुढील तपास पोलीस जमादार निलेश पेंढारकर, गजानन खरात करीत आहे.

एक तपानंतर झाला होता मुलगा

अशोक एक सामान्य कुटुंबातील मजूर वर्गातील व्यक्ती आहे. त्याला एक तपानंतर म्हणजे बारा वर्षांनी हा मुलगा झाला होता. आज रामेश्वरचे अपघाती निधन झाले असून, काळाने त्याच्यावर घाला घातला आहे. त्यामुळे गावात सर्वत्र हळहळ व्यक्त होत आहे.